ఎండల తీవ్రత కారణంగా శరీరంలో నీటి శాతం తగ్గిపోవడం, అలసట, డీహైడ్రేషన్, కండరాల పట్టేయడం వంటి సమస్యలు సాధారణంగా కనిపిస్తాయి. ఈ సమయంలో చాలా మంది చల్లదనం కోసం కూల్డ్రింక్స్, పంచదార కలిపిన పానీయాలు లేదా మార్కెట్లో లభించే సమ్మర్ స్పెషల్ డ్రింక్స్ను ఆశ్రయిస్తుంటారు. అయితే ఇవి ఆరోగ్యానికి అంతగా మేలు చేయవని నిపుణులు సూచిస్తున్నారు.
పంచదార అధికంగా ఉండే పానీయాలు తరచూ తీసుకోవడం వల్ల ప్రేగుల్లోని మంచి బ్యాక్టీరియా తగ్గి, చెడు బ్యాక్టీరియా పెరిగే అవకాశం ఉంది. ప్రేగుల ఆరోగ్యం మన రోగనిరోధక శక్తితో సన్నిహిత సంబంధం కలిగి ఉండటంతో, సహజమైన పానీయాలను ఎంచుకోవడం మంచిదని సూచిస్తున్నారు.
టీటీడీ కొత్త డోనర్ పాలసీ.. దాతలకు మారిన ప్రత్యేక దర్శనాలు.. సామాన్య భక్తులకు మరిన్ని అవకాశాలు
సమ్మర్కు ఉత్తమ కాంబినేషన్ – చెరుకు రసం, సబ్జా గింజలు
వేసవిలో శరీరానికి చల్లదనం, తక్షణ శక్తిని అందించే సహజ పానీయంగా చెరుకు రసం–సబ్జా గింజల కలయికను ఉపయోగించవచ్చు. ఈ రెండింటిలోనూ శరీరానికి ఉపయోగపడే అనేక పోషకాలు ఉంటాయి.
సబ్జా గింజల ప్రయోజనాలు
- సబ్జా గింజల్లో కాల్షియం సమృద్ధిగా ఉంటుంది. ఇది వేసవిలో కండరాల పట్టేయడం (క్రాంప్స్) తగ్గించడంలో సహాయపడుతుంది.
- వీటిలో అధిక మొత్తంలో ఫైబర్ ఉండటం వల్ల జీర్ణవ్యవస్థ ఆరోగ్యంగా ఉండటంతో పాటు ప్రేగుల్లోని మంచి బ్యాక్టీరియా పెరగడానికి దోహదపడుతుంది.
- శరీరానికి చల్లదనాన్ని అందించే గుణాలు వీటిలో ఉన్నాయి.
- యాంటీ ఆక్సిడెంట్లు, ఖనిజాలు ఉండటంతో శరీరానికి అవసరమైన పోషకాలు అందుతాయి.
- నీటిని అధికంగా పీల్చుకునే గుణం ఉండటంతో శరీరంలో తేమను నిల్వ ఉంచడంలో సహాయపడతాయి.
చెరుకు రసం ఎందుకు మంచిది?
చెరుకు రసం సహజంగా లభించే శక్తివంతమైన పానీయం. ఇందులో సహజ చక్కెరలు, ఖనిజ లవణాలు ఉండటంతో శరీరానికి త్వరగా శక్తిని అందిస్తుంది. వేసవిలో చెమట ద్వారా కోల్పోయే ఎలక్ట్రోలైట్లను కొంతవరకు భర్తీ చేయడంలో కూడా ఇది సహాయపడుతుంది.
ఫ్యాటీ లివర్ నుంచి రక్షణలో కాఫీ పాత్ర.. పరిశోధనలు ఏమి చెబుతున్నాయి?
ఎలా తీసుకోవాలి?
ఒక గ్లాసు చెరుకు రసంలో రెండు నుంచి మూడు స్పూన్ల సబ్జా గింజలు వేసి 5–10 నిమిషాలు నాననివ్వాలి. గింజలు ఉబ్బిన తర్వాత నెమ్మదిగా నములుతూ తాగితే మంచి ఫలితం లభిస్తుంది. ఒకేసారి గటగటా తాగకుండా కొద్దికొద్దిగా తీసుకోవడం మంచిది.
మధుమేహం ఉన్నవారికి సూచన
డయాబెటిస్ ఉన్నవారు చెరుకు రసం తాగకుండా, కొబ్బరి నీటిలో రెండు నుంచి మూడు స్పూన్ల సబ్జా గింజలు కలిపి తీసుకోవచ్చు. అలాగే పుచ్చకాయ, మామిడి వంటి పండ్ల రసాల్లో కూడా సబ్జా గింజలు కలిపి తీసుకోవచ్చు.
గుర్తుంచుకోవాల్సిన విషయం
సహజ పానీయాలు వేసవిలో శరీరానికి చల్లదనం, శక్తి అందించడంలో సహాయపడవచ్చు. అయితే వీటిని ఆరోగ్యకరమైన ఆహారం, తగినంత నీరు తాగడం, సమతుల్య జీవనశైలికి ప్రత్యామ్నాయంగా భావించకూడదు. మధుమేహం, మూత్రపిండాల వ్యాధులు లేదా ఇతర ఆరోగ్య సమస్యలు ఉన్నవారు ఆహారంలో మార్పులు చేసేముందు వైద్యుల సలహా తీసుకోవడం మంచిది.
తెలంగాణలో ఒంటరి మహిళలకు శుభవార్త.. ఆగస్టు 15 నుంచి కొత్త పెన్షన్లు అమలు
