ప్రస్తుత కాలంలో కీళ్ల నొప్పులు కేవలం వృద్ధులకే పరిమితం కాకుండా యువతలో కూడా అధికంగా కనిపిస్తున్నాయని ట్రెడిషనల్ హీలర్, హెర్బలిస్ట్ ఆంజనేయరాజు తెలిపారు. ముఖ్యంగా వర్షాకాలం, చలికాలంలో ఈ సమస్య మరింత తీవ్రంగా మారుతుందని ఆయన పేర్కొన్నారు.
ఆయుర్వేదం ప్రకారం కీళ్ల నొప్పులను “వాత వ్యాధులు”గా పరిగణిస్తారని, రుమటాయిడ్ ఆర్థరైటిస్ వంటి వ్యాధులను కీళవాతం అని పిలుస్తారని వివరించారు. ఆధునిక వైద్యశాస్త్రంలో రుమటాయిడ్ ఫ్యాక్టర్ (RA Factor), ESR, CRP వంటి పరీక్షల ద్వారా వ్యాధి తీవ్రతను అంచనా వేస్తారని చెప్పారు.
ఆయుర్వేద గ్రంథాల్లో 80 నుండి 84 రకాల వాత వ్యాధుల ప్రస్తావన ఉందని, వీటిలో కీళ్ల నొప్పులు, నరాల నొప్పులు, కండరాల సమస్యలు, సయాటికా వంటి అనేక రకాల సమస్యలు ఉంటాయని తెలిపారు. ప్రతి వ్యాధికి ప్రత్యేకమైన చికిత్సా విధానాలు ఆయుర్వేదంలో ఉన్నాయని చెప్పారు.
నరాల బలహీనత, కాల్షియం లోపం సమస్యలకు సహజ పరిష్కారాలు.
అనేక వ్యాధులకు ప్రధాన కారణం జీర్ణవ్యవస్థలో ఏర్పడే లోపాలేనని ఆయన అభిప్రాయపడ్డారు. సమయానికి ఆహారం తీసుకోవడం, నిల్వ ఆహారాలు, పాడైన పదార్థాలు, శరీర తత్వానికి అనుకూలం కాని ఆహారాలను నివారించడం ద్వారా అనేక ఆరోగ్య సమస్యలను తగ్గించవచ్చన్నారు.
ప్రస్తుతం సోషల్ మీడియా ప్రభావంతో చాలామంది ఏ పదార్థం మంచిదని విన్నా అధికంగా వినియోగిస్తున్నారని, అయితే ప్రతి ఆహారం అందరికీ ఒకే విధంగా అనుకూలం కాదని హెచ్చరించారు. ముఖ్యంగా వాత వ్యాధులతో బాధపడేవారు తమ శరీర తత్వాన్ని బట్టి ఆహారాన్ని ఎంపిక చేసుకోవాలని సూచించారు.
మునగాకు, పసుపు వంటి సహజ పదార్థాల్లో అధిక పోషకాలు, శోథ నిరోధక గుణాలు ఉన్నాయని చెప్పారు. పసుపులోని కర్కుమిన్ శరీరంలోని ఇన్ఫ్లమేషన్ను తగ్గించడంలో, రోగనిరోధక శక్తిని పెంచడంలో సహాయపడుతుందని వివరించారు.
ఎన్టీఆర్ నో చెప్పిన స్టోరీ కి.. బన్నీఓకే చెప్పాడా.?
వాత వ్యాధుల చికిత్సలో గుగ్గిలం ప్రముఖ పాత్ర పోషిస్తుందని ఆయన తెలిపారు. గుగ్గిలం ఆధారిత ఆయుర్వేద ఔషధాలు, తైలాలు కీళ్ల నొప్పులు, వాపులను తగ్గించడంలో ఉపయోగపడతాయని పేర్కొన్నారు. అలాగే శిలాజిత్తు వంటి ఆయుర్వేద పదార్థాలు కూడా పరిస్థితిని బట్టి వైద్యుల సూచన మేరకు ఉపయోగించవచ్చన్నారు.
ఆయుర్వేదంలో భస్మాలు, లోహ ఔషధాలకు ప్రత్యేక స్థానం ఉందని, సరైన శుద్ధి ప్రక్రియలతో తయారైన ఔషధాలను నిపుణుల పర్యవేక్షణలో మాత్రమే ఉపయోగించాలని సూచించారు.
కీళ్ల నొప్పులు, రుమటాయిడ్ ఆర్థరైటిస్, ఆస్టియోపోరోసిస్ వంటి సమస్యలతో బాధపడేవారు ఆహార నియమాలు, జీవనశైలి మార్పులు పాటిస్తూ, అర్హత కలిగిన వైద్యుల సలహాతో చికిత్స పొందితే ఉపశమనం పొందే అవకాశాలు మెరుగ్గా ఉంటాయని ఆంజనేయరాజు తెలిపారు.
అలాగే పెసరపప్పు, దోసకాయ, గోంగూర, వంకాయ, కొత్త చింతపండు వంటి కొన్ని ఆహారాలను వ్యక్తిగత ఆరోగ్య పరిస్థితులను బట్టి పరిమితంగా తీసుకోవాలని సూచించారు. సరైన ఆహారం, వ్యాయామం, విశ్రాంతి మరియు వైద్య సలహాలతో కీళ్ల ఆరోగ్యాన్ని కాపాడుకోవచ్చని ఆయన పేర్కొన్నారు.
గమనిక: ఈ వ్యాసంలో ఉన్న ఆయుర్వేద చికిత్సల గురించి పేర్కొన్న అంశాలు సంప్రదాయ వైద్య అభిప్రాయాలు మాత్రమే. కీళ్ల నొప్పులు, రుమటాయిడ్ ఆర్థరైటిస్ వంటి సమస్యలకు తప్పనిసరిగా అర్హత కలిగిన వైద్యులను సంప్రదించడం మంచిది.
